- 103 -

1335. Juli 25. Liegnitz.

Herzog Boleslaus gelobt den Bürgern zu Liegnitz ohne Rath und Wissen derselben keine neue Münze schlagen zu lassen.

Wir Bolezlaw von gotes genaden herczoge von Slens vnde herre zcu Legnicz tun kunt allen den, di disen brif sehn ader horin lesin, das wir geloben vnsem getruen Burgern czu Legnicz, daz dise muncze vnde cleynen phenninge, di nu sin in vnsem lande zcu Legnicz, sullen gehen vnde vnvorrukt bliben hi zcwissen vnde von Ostirn, dy nu nehst kumen vber ein jar, vnde darnach, wen wir eine nue muncze oder nuwe cleine phenninge wallen haben in vnserm lande zcu Legnicz, di sulle wir lasin machen mit rate vnde wissen vnser burger zcu Legnicz, vnde was muncze adir cleine phenninge wir vorbas me lasin slan adir machen do selbest in unserm lande zcu Legnicz, di sullen von der zeit, als si vsgehen, zcwey gancze iar gehen vnvorrukt vnde bliben. Das gelobe wir vnsem vorgenanten burgern zcu Legnicz stete vnde gancz zcu halden, di wile wir lebin, vnde zcu geczuge der selben rede gebe wir desin brif mit vnser wissene vorsegilt mit vnserm ingesegil. Das ist geschen in vnser stat zcu Legnicz an sente Jacobs tage des heyligen zcwelfboten, nach gotis geburt thusent iar, dri hundert iar in dem vumph unde drissiksten iare. Dobie sint gewest vnse man her Jeske von Berndorf, her Jeske Buziwoy, Albrecht Beyr, Hannus von Rimberg, Hannus Zchirmer, Heinrich von Landiscrone vnde Johannes von Scheindorf vnse lantscriber, der desin brif hat gescriben.

O. d. St. L. No. 43. An Pergamentstreifen das Reitersiegel. Die stellenweise durch Flecken vertilgte Schrift ist widerhergestellt nach der Abschrift des alten Privilegb. p. 15.

Urkunden-Buch der Stadt Liegnitz und ihres Weichbildes bis zum Jahre 1455 - Herausgegeben dr Friedrich Wilhelm Schirrmacher - Liegnitz 1866